Witej nowy roczku

• Facebook
• Pinterest
• Twitter
• Gmail
• Drukuj

Witej nowy roczku

Jo se dycki na Nowy Rok robia jakiś postanowiyni. Kejś tych postanowiyń było wiyncy,  teroz se myśla, że jedne taki, kere sie do wykonać! Zapisza se go na kartce a skowom za łokładka łod Biblijki, tam sie mi niy straci. Wyciongom ta kartka dziepiyro za rok, we Sylwestra a już wiym jak mi poszło! Hańdowni żech nic niy zapisowała, ale jak prziszoł Nowy Rok toch czynsto-gynsto już niy pamiyntała, co żech se łońskigo roku łobiecała. Teroz to wiym na isto!
Już ze dwa roki pisza se na ta sekretno kartka tyż to, co bych se życzyła, żeby sie spełniło. Zdało mi sie dycki, że mi sie nic niy spełnio. Łod tego czasu widza, że tak ni ma. Kożdy rok mi sie cosikej powiedzie, chocioż insze życzynia muszom jeszcze troszka poczekać! Prawie bezto nauczyłach sie mieć uciecha ze małych rzeczy!

Niy myślcie se, że mi we życiu wszystek idzie tak gładko. Już pora razy padałach se, że bez rok chocioż troszka schudna, ale z tym je ciynżko! Teroz se już tego niy planuja, ale tak po cichuśku licza na cud! Jak byście se chcieli wywrożyć, jaki bydzie tyn nowy rok, co nos czeko. Musicie iść bez połednie we Nowy Rok na szpacyr kaj do pola abo do parku. Jak bydzie słońce na niebie, to bydzie łod połowki, jak troszka śniyg posypie, to bydom piniondze! Śniyg bydzie skrzipioł pod nogami, to sie nom na isto coś osobistego spełni, ale żeby wrożba sie wypełniła do końca, trza sie jeszcze łobejrzeć za jakom zwierzinom ( kotym, psym zajoncym abo ptokiym). Jak bydzie lobrocono ku nom przodkiym, to sie już możecie radować, ale jak zadkiym, to sami wiycie…

Grymino