Wilijno legynda ło stromach.

Przed Wilijom my dycki w doma strojili chojinka. Kolyndow jeszcze śpiywać niy szło, bezto nom starka przi tym bojała Wilijno legynda ło stromach, a szło to tak:

Do Betlejym prziszli świynty Józef a Paniynka Maryja. Pytali ło nocleg, ale wszyndy im łodkazowali. Na koniec zaszli do taki szopki kaj stoł łosioł pospołu ze wołym. Po połnocy tam sie narodził maluśki Jezusek.Tam tyż prziszli go witać pastyrze, co ich anioł zawołoł. Kożdy prziniosł, co tam mioł: konsek syra, pecynek chleba abo gorczek mlyka.

No a potym sie ło Jezusku dowiedzieli trzej krolowie, kożdy z inszej krajiny, bo na niebie pokozała sie gwiozda, co ji kometa godajom. Zakludziła ich do Jerozolimy do krola Heroda, bo we wielgi ksiyndze wyczytali, ze je to gwiozda łod nowego krola żydowskigo. Ale Herod kozoł im iść dalij i tak trefili do stajynki.

Tam dali Dziecionteczku  roztomańte dary bogate. A jak już mieli iść nazod, Jozefowi śnił sie anioł, a padoł, coby krolowie wracali do dom inkszom drogom! Jozefowi zaś nakozoł wziońć Dziecionteczko ze Maryjom na łosiołka i gibko uciekać do Egiptu, bo Herod zamiarowoł Jezuska zabić! Tam trza było iść  bez pustynio, kaj ni ma sie kaj skryć! Wojoki już deptali im po piyntach, bezto Maryja sie łogromnie uradowała, kiej ujrzała gryfny, zielony strom. To była łosika, ale jak łona usłyszała ło Herodzie, to sie zaroz zatrzonsła łod strachu i im niy pomogła, bezto za kora trzyńsie sie aż do dziśdnia, nawet jak niy ma wiatru! Konsek dalij rosnoł taki wielgaśny strom, co mianowoł sie lyska. Łon prziklupił sie ku ziymi, a we łostatni kwili skrył Świynto Familijo. A potym jałowce porosły murym kole lyski, bezto wojoki łod Heroda żodnego niy znodli.

Za te dobre uczynki lyski a jałowce ludzie radzi sadzom wele swojich chałpow a wierzom, że te stromy chroniom ich łod pierona!

Grymlino.

Pin It on Pinterest

Share This

Udostępnij!!!

ten post swoim znajomym!