Ślonsko moda

• Facebook
• Pinterest
• Twitter
• Gmail
• Drukuj

Ślonsko moda

Piyrwej ludzie mieli troszka inaksze łachy niż teroz. Do przikładu:

Moja starka Elza

moja starka Elza łoblykała si bez cołki życi po chopsku. Starzik Johan chcioł, coby sie przestrojiła, ale łona padała, żeby to wyglondało, jako by sie sama siebie zaparła.
– Przeca afa tyż do sie ustro­jić we ludzki łobly­cze – godała – ale łod tego czło­wie­kiym niy bydzie!

Starka skończyła łoziym klas nimiecki szkoły, godała dobrze po nimiecku a po polsku tyż trocha poradziła czytać a pisać. Jeszcze przed piyrszom wojnom robiła na banie we Rybniku na telegrafie, ale na paniczka sie niy przestrojiła. Łoblykała galotki ze nogawicami, na to ze trzi spodniczki (na niedziela dziołchy miały i siedym), na wiyrch kiecka ze lajbikiym, potym jeszcze jakla, jedbowno abo płocienno zopaska a na gowa chustka. Ku tymu jeszcze sztrykowane ponczochy ze sztrombantami a pantofle na drzewiannych spodkach.

We biurze ni mogła chodzić we pantoflach, bo fest trzaskały po flizach, bezto bez cołki rok miała na nogach czorne strzewiki ze sznurkami. Na zima łojciec ji kupił kaszmirowo chusta, coby niy przemarzła. Starka miała dziewiyncioro braterstwa, ale łojce ło dziecka fest dbali. Bezto jak we niydziela szłi do kościoła, to wszyski były piyknie postrojone. Starczyno mamulka miała kobuk ze koronkami a szlajfami. Jeji chopeczek Karlik łoblycze dowoł szyć ze nojlepszej wołny u krawca we Rybniku. Krom płociynnych koszulow mioł tyż dwie jedbowne, a strzewiki ze cholewami, ze prawej skory. Bez cołki rok nosił czorny pliszhut. Starka mi padała, że jeji tatulek był fest robotny: bez lato obrobioł pole a chodził po murarce, a bez zima robił na grubie, podwiel zdrowie mu dopisowało!

Za to moja oma wyglondała cołkiym inaczy,

bo chodziła po pańsku. Narodziła sie we mieście, jeji tatulek był sztajgrym na grubie a starzik mioł trzi sklepy ze miynsym. W tej familiji dziołchy niy szły do roboty, bo niy było potrza.
Roz jedyn, jak mi było ze siedym lot, we ominym sztambuchu znodłach tako maluśko fotografijo, kaj były odebrane jakiś dziołszki we biołych szatkach ( nejści ze komunije), pełno babow we kieckach a chustkach, a we pojstrzodku jedna paniczka we małym hutliku a we pelerynie. Myślałach, że to była ta hrabina ze dwora, ale to jednako była moja oma!
Teroz prawie na cołkim świecie ludzie łoblykajom sie jednako, możnej tak je lepi….
Grymlino. Nowiny Wydanie: 2010/07 (2743)

Jeśli podoba Ci się ten tekst koniecznie zajrzyj tutaj.

Słowniczek:

spodniczka – halka,
jakla – bluzka,
hutlik, pliszhut, kobuk – kapelusz,
strykowany – dziergany na drutach,
stromband – gumowa podwiązka.