• Facebook
• Pinterest
• Twitter
• Gmail
• Drukuj

Sirynkom do Włochów – sirynka – krolowa szos część 1

Krolowa szos.

To było we tych czasach, kiej na nasza rodzime auto, co mu było sirynka na miano godali pieszczotliwie: krolowo szos! Nasz somsiod Waldek nabył taki piyńcioletni wehikuł, dobrze go wyrychtowoł a wyglancowoł, bo chcioł nim jechać do zagranice: niy do żodnych Czechow, Wyngrow ani Dydyeru, yno do samych Włochow! Starka go straszyła, że tam same porwane ludzie mieszkajom, ale łon sie zaparł, że na dziesionto rocznica ślubu swoja babeczka do Rzimu zawiezie. Łodstoli łoba pora godzin, coby dostać te sto dolarów, co im sie na ksionżeczki walutowe noleżały. Za złotki kupili namiot a jodło, co sie niy psuło. Śpiwory zrobiła im starka ze dwoch rubych dekow zeszytych do kupy. Na wszelki wypadek wzieni se jeszcze dwadziestolitrowy baniok wody, a pojechali!

Po drodze mieli ze Cilkom tela przigodow,

że to sie ani we gowie niy miyściło! Jo tymu ani wiela niy wierziła, bo somsiod był wigyjc, ale jego babeczka to wszystek potwierdziła! Zaroz na granicy nasi kozali im cołki auto wyladować, bo ni mogli uwierzić, że do Włochow niy jadom na handel, yno tak na wycieczka. We Czechosłowacji chycili ich policjanty a straszyli mandatym. Waldek ponoć za gibko jechoł, chocioż Cilce sie zdało, że to było prawie na łopy! Jak im padali, kaj jadom, to policjony yno gowami pokiwali a padali, że to bydzie dzieriyro „pokuta”. Somsiady byli radzi, że im tak wszystek gładko poszło, ale ni mieli ani pojyncio, co ich jeszcze czeko!

Na Wyngrach kapli sie że kajś stracili mapa. Isto to było wtedy, jak przed tym bykiym zdybali, co im chcioł namiot przewrocić, musioł mu sie czerwiony kolor niy widzieć! Dobrze, że sirynka mieli siwo, to gadzina dała ji pokoj! Cilka godała, że te miejsce zaroz się ji niy widziało, ale było poźno wieczor a łoni byli tacy zmochani jazdom, że już na nic niy zważowali yny leźli do śpiworow! Mapa kupili se nowo, ale niywiela mieli śni pożytku, bo wyngierski to je taki jynzyk, co śniego nic niy wykombinujesz! Troszka lepszy było we Jugosławii, tam ludziska troszka polski rozumieli. Za dwie pory teksasow dali Waldkowi stary namiot, kupa jodła a banioczek wina. Kole połednia somsiady podjechali do szlabanu pomalowanego na bioło-czerwono-zielono, a do Włochów mieli już yny tela, co czopkom ciepnońć!

 Grymlino.

Sirynkom do Włochów – sirynka – krolowa szos część 2

(Nowiny 2010 r.)

Słowniczek:

wigyjc – dowcipniś, żartowniś,
zdybać – uciekać,
siwy – szary,
czopkom ciepnońć – blisko.