Po co komu kryka?

• Facebook
• Pinterest
• Twitter
• Gmail
• Drukuj

Po co komu kryka?

Po co je kryka wszyjscy wiedzom, wiadomo, na starość trzecio noga sie przido! Już we blank starej Grecyji ło tym wiedzieli, że stołek na trzech nogach sie niy przewali, bezto wykombinowali trójnóg. A tyn jejich Herakles tyż ło tym wiedzioł, bo jak sie go egipski Sfinks spytoł, co to je, co rano chodzi po sztyrech, we połednie po dwóch a we wieczór po trzech , to łon zaroz padoł, że to je człowiek!

Tak ze sto lot nazod nastała moda na kryki i kożdy elegant tako musioł mieć! Były kryczki bambusowe abo z jakigo inkszego lekigo drzewa, jedne ze łobłongiym, drugi ze kulkom do rynki. Spomnijcie se filmy ze Charlie Chaplinem?!

Mój starzik tyż żył we tamtych czasach, ale niy wiym, eli tako kryczka nosił, bo mie jeszcze na świecie niy było, ale co jo go już pamiyntom dycki jakoś kryka mioł. Nojwiyncy to mi sie podobała tako jedna zielono, zamiast łobłonga miała taki uszko, co sie łogibało. Ale starzik, co jom czynsto broł do lasa padoł, ze to ni ma kryka yno „myśliwski stołeczek”, a pokozoł jak sie na nim siodo, ale jo tak niy poradziła, bo żech jeszcze miała za krótki szłapki!

Jak starzikowi

było bez siedymdziesiont zaczon chodzić do lasa ze prawom krykom, bo godoł, że mu sie lekcy szło. Nojprzód dostoł na urodziny gorolsko kryka ze Wisły, ale norzykoł, że je ciynżko, bezto jak roz mój tatulek był we Katowicach, poszoł do ekstra-sklepu a kupił swojimu faterkowi kryka ze bambusa. Nasz starziczek prziznoł, ze je piykno, leko ale do polskigo lasa, to łona sie niy nado, że trza by jom było łokuć a poszoł śniom do kowola. Tyn chop zrobił, co trza, ale trocha bambus łopolił i kryka sie hnet złomała! Bezto teroz starzik zeszykowoł se som tako kryka, jako chcioł. Wybroł se rowno gałonź ze czornego bzu, co mo taki biołe smrodlawe kwiotki dobre na kaszel, łobłonk zgion, potym pomoczył go we wrzawej wodzie a na spodku doł łokuć u kowola Pustelnika, co mioł kuźnia na Dolnym Przedmieściu.

I z tom krykom szoł wszyndy, a dziynnie chodził te piytnoście – dwaścia kilometrów. To by ani niyjedyn młody niy poradził, a jeszcze na plecach niósł rukzak a swoja flinta!

Po wsiach go jeszcze do dzisio ludzie spominajom.

Grymlino. „Nowiny” w 2009 r.

Drogi czytelniku jeśli podoba Ci się ten wpis zapraszam do czytania innych tekstów z działu po naszymu.

Słowniczek:

kryka – laska,
łobłong – pałąk,
wrzawo woda – ukrop.
Rukzak – plecak.

 –