%20no-repeat%20center%20center;-webkit-background-size:cover;-moz-background-size:cover;-o-background-size:cover;background-size:%20cover;)
Choroba niy wybiyro
Isto pamiyntocie jak mogom targać zymby? Jedyn nasz somsiod niy rod chodził do dyntysty. Dycki godoł, że chodzyni na kontrole do „zymbocza” to je strata czasu a piniyndzy: długo sie tam czeko, a potym jeszcze doktor wynokwi jako naprawa, co krom bolu, trza za nia jeszcze słono zabulić!
Myć zymby tyż mu było za ciynżko, bezto niy trwało długo, a łoroz we nocy zaczły go targać ze prawej strony na zadku. Tak fest go bolało, choćby mu łeb chciało rozsadzić! Do rana deptoł po izbie, a jak usłyszoł, że stanyła jego baba, to zaroz chcioł po ni jaki dobry lyk. Babeczka zrobiła mu omszlag ze szpyroniu, ale potym było mu jeszcze gorzi, bezto doł sie we końcu namowić do dyntysty. Niy mył sie ani niy łogolił, yny łowinoł se gymba zielonom chustkom łod szwigermutry a deptoł do Ośrodka Zdrowio. Tam pod gabinetym łod dyntysty czekały trzi baby, ale łon tak jamrowoł, że go przepuściły.
Somsiod uradowany, że niy bydzie musioł wiela czekać, rozparł sie na tym śmiysznym zeslu, co sie kopyrto a łotwarł gymba, ale dyntysta tam małoco widzioł, bezto kozoł chopu sjońć chustka, a łobrocił sie na bok, coby narychtować klyszcze. Jak już mioł wszystek pod rynkom, łokryncił sie nazod ku pacjyntowi a wrzasknoł tak głośno, że go było słychać aż we poczekalni, tak sie borok wylonkł, bo na stołku siedzioł jakiś zielony na pysku straszek!
Kwilka to trwało, aż doktor sie spamiyntoł, a padoł:
-Panie Ziymba, jak bych wos niy znoł, to bych se myśloł, że mi sam prziszoł jaki utopek ze Rudy!
Tyn roz somsiod mioł szczyńści, niy trza było targać zymbow, bo mu sie cisł „zomb mondrości”. Jednako skuli tego musioł jeszcze przedeptać ze trzi noce, aż mu sie zomb do końca wyrżnoł…
Grymlino.
/fragment tekstu z Nowiny 2010/
Słowniczek:
deptać po izbie – spacerować po pokoju,
umszlag, omszlak – okład,
szpyroń – spirytus,
wynokwi – wymyśli,
szwigermutra – teściowa,
jamrowoł – jęczał,
zesel, co się kopyrto – fotel dentystyczny,
borok – biedak,
wytragać zymby – wyrywać zęby,
ale : zymby go targajom – zęby go rwą, bolą.
