Dziyń teściowej – szwigermutra.

• Facebook
• Pinterest
• Twitter
• Gmail
• Drukuj

Dziyń teściowej – szwigermutra

Piontego marca przipado „Dziyń teściowej”. Teściowo to je baba łod teścia. To sie łogromnie gupio słucho, jakby bez chopa nic niy znaczyła! U nos jeszcze nikerzi godajom szwigermutra a na teścia szwiger. Nojlepi na tym wyszły te gizdy Francuzy, bo u nich teściowo nazywo sie „piykno matka”. Tako francusko teściowo, to sie ni może na ziyncia łobrazić, choćby ji nazdoł, bo ji tak piyknie godo!

No, ale dość szpasow, sama żech tyż je szwigermutrom. Ziyńcia jeszcze ni mom, ale mom synowo, cołkiym fajno dziołcha! Wiycie, że ludzie już zapomnieli, że na synowo my kiejś godali niywiasta? Słyszałach, jak jedyn uczony chop godoł, że to sie wykłodo po staropolsku jako „nieznana kobieta”. Bo łona prziszła do rodziny a żodyn jom tam niy zno, krom jejigo chopa.

Jo se myśla, że już teroz ni ma takich strasznych szwigermutrow,

co nimi straszyli we ślonskich wicach, a jak jeszcze kaj som, to chneda zaginom, bo świat idzie porzad do przodku! Teroz baby po wiynkszinie robiom we robotach, łobiadow ziyńcioszkom niy warzom a dziecek niy bawiom, no chyba, że som na penzyji a chcom swojim dzieckom pomoc! Teroz starzi łod młodych niy zależom, jak downi, bo pynzyje majom, przyndzy młodzi u łojcow we kapsie siedzom, niż sie sami dorobiom.

Ciynżko je być synowom, ale szwigermutrom, tyż ni ma leko, sami to isto wiycie! Jo szwigermutra miała dobro, ale troszka nom to trwało niż my sie dogodały, bo to ni ma tak łaps! Jak by łona mie wychowała, to by my sie lepi rozumiały, ale moja mamulka była pora lot młodszo, wiyncy we państwowej robocie łotrzaskano, na tyn świat sie inaczy dziwała, a jo wiela po ni tyż wziena. Jednako jak łobie strony tego chcom, to wszystek do sie zrobić. Moja starka dycki godała, że jak je zgoda, to sie dwoch na jednej słomce prześpi!

Grymlino.

/fragment/ z Nowiny Tygodnik Regionalny 2010 

Słowniczek:
pynzyjo – emerytura.