Dużo zdrowio dla tatulka – Ło naszym tatulku
Tyn, gdo mo abo mioł dobrego tatulka, mo wiyncy, jakby wygroł los na loteryji! – tak dycki godała nasza starka Elza, a miała prawie. My ze bracikiym te szczyńście mieli!
Nasz tatulek dycki mioł do nos czas. Chciało mu sie s nami pogodać, chocioż prziszoł ze „tuplowy”. Niy szło by to jednako bez pomocy naszej mamulki, co nojwiyncy przi chałpie robiła. Po szychcie łojciec rod nom rozprowioł ło świecie. Czytoł nom roztomańte ksionżki. Jak my czego niy rozumieli, to nom tak długo łobjaśnioł, aż my tym małym rozumkiym pokapowali. Mioł zamiłowani do geografii, a za młodu zjeździł prawie cołko Europa. Insze dziecka ni miały ani pojyńcio, czamu je noc a dziyń, a my to wiedzieli, niż my poszli do szkoły, abo że som na świecie tacy mali ludzie, co im godajom pigmeje. Tatulek ksionżka ło nich przeczytoł, a potym nom pokozoł łobrozki a zdjyncia, a wszystko łopedzioł.
Fest żech mu przoła
Fest żech mu przoła, ale czasym mie wkurzoł, jak godoł, że „łosiołkowi trza jasełka podnosić, coby sie wiyncy nauczył”, ale wtedy jo niy wiedziała, że łon mie tak kwoli. Wiym, że tata nom fest przoł, chocioż nom nigdy tego niy padoł.
Jak mi było ze jedynoście-dwanoście lot, to łojciec wymyślił tako gra: kupowali my dwie, taki same, sobotni gazety ze krziżowkom, a potym my łoba (jo ś nim) sie ścigali, kiery piyrszy skończy. We niydziela, to my już czynsto handlowali na słowa. S poczontku wygrywoł tatulek, ale potym prziszoł czas, że jo zaczłach wygrywać. Wtedy mi padoł: Jo cie dziołcha już wiela niy naucza, a na tych twoich malunkach (jo rada malowała) sie wiela niy wyznom, bezto pódziesz jutro do takigo chopa łod malowano, niych cie dali uczy!
Wiym, że bez naszego tatulka
niy robiła bych tego, co dzisio robia. Jak mie abo bracikowi sie co powiodło, łogromnie sie cieszył, choć niy doł tego po sie poznać, ale my to i tak wiedzieli!
Jak już był fest chory na serce, to mi kiejś padoł tak: wiysz, jo se myśla, że jo cie już tela nauczył, że se sama dosz teroz w życiu rady…
Ni ma go już snami bez dwaścia lot, ale sztyjc nom go brakuje.
Wszystkim Tatulkom, starym i młodym życza dobrych dziecek, a bajtlom, coby Tatulki miały do nich czas bez cołki rok, niy yno dwadziestego trzecigo czyrwnia!
Grymlino
(Nowiny 2009 r.)
Słowniczek:
tuplowa – szychta 16-godzinna,
przoć – kochać,
rozprawiać – opowiadać.
Zapraszam do czytania po naszymu
Koniecznie zajrzycie też na mój Facebook
