Co żyje wele nos?
Niby to, co momy wele siebie żywego, to wszystek znomy, ale eli je to prowda? Jak żech była bajtlym, toch sie psow łogromnie boła, bo starsi mie porzad warowali, że mie mogom ługryźć, bezto jak sie kery psiok, choćby i maluśki, na Kościołku pokozoł, to jo zaroz w nogi! Isto, że mie potym gonił bez poł drogi, bo żech zwykow łod psow niy znała. Jak to ze tymi stworami naprowda je, przekonałach sie dziepiyro, jak my łod starzika dostali piyrszego psa.
We szkole na lekcjach przirody mieli by uczyć dziecka łod małego jako sie trza łobchodzić ze zwiyrzami, co wele nos żyjom. Nojważniyjsze je, coby dziecka wiedzieli, czego sie majom stryc a czego boć sie niy muszom, a przede wszyskim, że zwierz tyż bol czuje, bezto ni mo sie mu łukrziwdzić!
A jak by se tak mogli jeszcze łobejrzeć żywo krowa, koza, prawego konia, a jeszcze ku tymu pogłoskać psa abo kota, to by na tym lepi wyszli niż na łoglondaniu filmow ło stworach, co żyjom na drugim końcu świata. Mój mały somsiod, co chodzi do trzecij klasy, padoł że u starki we chlywie widzioł antylopa! Jo se pomyślała, że możnej godo ło sorniku, co sie do jego starki jakimś cudym dostoł, ale jego mamulka mie łobjaśniła, że szło ło koza!
Moja cera
tyż znała yno pszynica a łowies, ale co to je reż a jynczniyń ni miała pojyncio! Jak kere łobiyli wyglondo dziecka we mieście niy wiedzom a stykło by sie wybrać w czyrwniu na szkolno wycieczka do nojbliższej wsi.
Isto daliście pozor, że bajtle myślom cołkiym inakszy jako starsi? Moj synek mioł trzi lata i łogromnie chcioł mieć pieska. Zaroz padałach mu, że trza ze psiokiym chodzić na dwor, dować jeść a kupki po nim wyporzondzić! Mały kwilka pomyśloł a padoł, cobych kupiła psa bez dupki! Na poczontek dostoł psa-graczka, ale jak już poradził psa łobsłużyć, to mioł prawego kamrata, co żył snami szesnoście lot.
Łoni rechtorka, co uczy biologiji we liceum, strasznie ubolywała nad tym, że jedyn synek przed maturom pokwolił sie, że widzioł w lesie chroboka jelonka, co yno na dymbach żyje, a jak sie go spytała, co śnim zrobił, to łodpedzioł, że zadeptoł!
Praje teroz je nojwyższy czos, coby z tym wszyskim co zrobić!
Grymlino.
Slowniczek:
Zwiyrz – zwierzę,
Stwora – żywe stworzenie,
Dać pozor – zwrócić uwagę na coś lub kogoś,
Kamrat – kolega, przyjaciel,
Łoni – w ubiegłym roku.
Jeśli podoba Ci się gawęda Co żyje wele nos – zapraszam do czytania innych opowieści po naszymu.
