Gawęda po naszymu – Betlejymsko gwiozda a łostrokrzew

Przeczytajcie gawęda po naszymu  o zielonych świątecznych nowościach, które  na większą skalę pojawiły się zaledwie kilka lat temu. Dziś mamy wiele odmiam poinsetii, jedynie ostrokrzew pozostał taki sam jak dawniej.

• Facebook
• Pinterest
• Twitter
• Gmail
• Drukuj

Gawęda po naszymu

Betlejymsko gwiozda a łostrokrzew

Jedni to se ani niy umiom przedstawić Godnich Świont bez tyj gwiozdy betlejymski (co i tyż poinsetia  godajom). Miejscami nawet chojinka (krisbaum) zastympuje, samach widziała we jednym szałfenstrze ta poinsetia szklanymi kulkami łobwieszono. Gwiozda to niy je, no ale jak by sie kery uprził, toby i tak szło pedzieć! Ta moda prziszła ku nom ze Ameryki a do nich isto trefiła ze Australije, kaj ta roślina na dziko rośnie.

We Australiji, kaj miyszko tyż nasza familijo, Godni Świynta przipadajom bez lato. Niyroz je taki war, że wytrzymać niy idzie! Jak my im posłali kejś fotografije ze Wiliji, to im było żol, że ni majom śniega a chojinki a swoim dzieckom łobiecali, że jak przilecom do Polski to im gory a śniyg pokożom! Ale uradowali sie, jak uwidzieli na naszym stole dobrze im znano poinsetia.

Tyn łostrokrzew to se isto spominocie, był na wszyskich kartach, co na Świynta łod ciotki ze Anglie prziszły. Tam kożdy Mikołoj mioł przi czopce taki zielone listki ze czerwionymi jagódkami. Teroz łostrokrzew mom na placu przed chałpom, ynoch sie tych kuleczek czerwionych niy doczkała, bo ku tymu muszom być aż dwa krzoki. Jak my go lampkami łostrojili ,to kożdy wieczor ludzie wele nos przistowali a dzieckom go pokazowali!

No to tela ło tej paradzie ze zagranice, bo my tyż momy sie czym pokwolić! Za moich modych lot małokery mioł kupne glaskugle a wszyski insze ciciridła na chojinka ludzie robili sami. Łojcowie kupili nom wylepianki i klyj, a prosto słoma to my se sami ze szopki prziniośli, a jaki fajne rzeczy my z bracikiym robili! Jeszcze nikere znajomki do dzisio nimi chojinka strojom.

Grymlino