Silwestra -Silwerstrowe kupowanie

Zaczło sie łod tego, że jo już pora lot nikaj na Silwestra niy była. Kamratka padała, że łona tyn rok idzie ze chopym na muzyka do rymizy strażacki we swoji wsi, a ło te dwa miejsca, to sie nom postaro. Po jedno po blisku a po drugi niydrogo. Jeszcze jodła miało być fol, ale halba, to smusieli chopy sami prziniyść, bo tam wyszynku miało niy być.

Zaroz na drugi dziyń jo ciepłach sie ku szranku, ale tam niy było nic modnego! Znodłach jedyn czorny komplet, co by uszoł, jakby ze bluzki ta pozłotka niy slatywała. Zaroz żech go wyciepła, choć przeleżoł siedym lot! Potym, łobejrzałach jeszcze czorno, długo kiecka, ale miała flek, łod czegoś masnego. I tak dobrze, że mi sie we szranku mole niy zalongły! Miałach tyż piykno bioło bluzka, co w ni yno roz byłach na rozdaniu nogrodow, ale kamratka padała mi, co już taki niy som we modzie! Skuli tego ugodały my sie, że pojadymy za tydziyń do sklepu do Rybnika. Przeszła żech sie u nos po butikach, ale ciuchy zdały mi sie dość drogi, bezto padałach se, że te pora dni jeszcze zetrwom.

Spotkały my sie pod cyntrum handlowym.

Wlazły my do piyrszego z kraja sklepu, ale tam młodo sprzedowaczka już łod proga padała, że nic na nos niy znojdzie a posłała nos do butiku ze rozmiarami XL. Tam tyż my niy znodły nic, na czym by szło łoko zawiesić: nic yno szaro-burki, a tego to jom cołki szrank! Wlazły my jeszcze do sklepu do „puszystych paniczek”. Ale tam było jeszcze gorzi! Jak mi sie podoboł kolor, to szaty wyglondały jak namiot, abo były za długi. Kamratka dopasowała chocioż lilowo bluzka a jo ni miała porzad nic, a chciało mi sie płakać!

W końcu paniczka sprzedowaczka padała niyśmiało, że mo jeszcze jedne szaty. Coby możnej na mie były, ale som troszka drogsze. Przimierziłach a rychtik pasowały. Yno cyna zwaliła mie z nogow. Kosztowały bez dwa tysionce! A kaj jeszcze strzewiki a taszka? Ku takim eleganckim szatom przidała by sie tyż piykno keta abo prawe korale! Ludeczkowie roztomili, jo za taki piniondze bez dwa miesionce użyć musza ze familijom, bezto, na żodno muzyka tyn roku niy ida!
A Wom wszystkim życza fajnej zabawy a Szczyńśliwego Nowego Roku 2019!

Wasza Grymlino.

Słowniczek:

Nikaj – nigdzie,
Fol – dużo,
Halba –pół litra,
Zetrwać – powstrzymać się , wytrzymać,
Keta – łańcuszek, kolia.

Zapraszam do czytania : Witej nowy roczku.

Silwestra -Silwerstrowe kupowanie