Dobrze mieć zamiłowani

• Facebook
• Pinterest
• Twitter
• Gmail
• Drukuj

Dobrze mieć zamiłowani

Jo se tyż tak myśla, bo inaczy bych ani niy malowała, ani Wom bojek niy pisała, ale niy styknie go mieć, trza go jeszcze flyjgować!
Tak przed połrokiym potkała kamradka, co wele mie za młodu miyszkała. Już pora miesiyncy była na pynzyji, a strasznie sie ji ckniło za robotom. Lamyntowała, że w doma porzad siedzi sama a ni mo do kogo gymby łodewrzić. Padałach ji, coby sie wziena za jako miło sercu robota, ale łona mi łodpedziała:

-Powiydź sama, co jo takigo mom robić? Mój chop stowo ło szostej, bo jeszcze troszka przirobio, jymy śniodani, potym jo łoporzodzom pomiyszkani a co drugi dziyń ida do sklepu na łosiedlu. Na zrobiyni łobiadu starczo mi godzina, a co potym robić bez cołki popołednie? Mój stary, jak przidzie ze roboty, to lygo na zofa a czyto gazety a wiela razy przi nich uśnie!

A powiydź mi jeszcze: wiela to idzie jeździć do dziecek, a siedzieć im na karku? To jo ni mom rada! Ty, to co inszego, ty mosz talynty, ty to sie możesz teroz rozwijać, a jo ? Szkoda godać!

-Co jo pamiyntom, to ty żeś miała wielgi talynt a grajfka do pieczynio, pamiyntosz jak my uratowały ta spolono dorta, co miała być na Janczyno łosiymnostka?- przipomniałach.-Ty mosz prawie, to bych jeszcze poradziła…

Kamradka wziyna sie do roboty

a teroz sie łod ludzi obegnać niy może, bo rychtik dobre dorty piecze a nowe ciasta wynokwio. Baba je jak niy ta sama, teroz ani ni mo czasu pogodać bez telefon a widzymy sie roz za ruski rok!

Niy myślcie se, że yno baby majom talynty roztomańte, chopy tyż!
Jedyn taki mój znajomy za młodu rod malowoł obrozki, ale to pociepł, wiadomo, życi czasym człowieka zmusi, coby na ziym ślozł! Teroz mioł jednako ciynżko sie do tego nazod zastrojić, sztyjc mu coś przeszkodzało, ale jego dziecka mu kupiły na Mikołaja wszystko, co potrzebowoł do malowanio a jo go trocha podpuściła, bo zaczłach godać ło tym, co jo se teroz namaluja…Chop zasztartowoł, a maluje do dzisio. Porzad jeszcze szuko swoji drogi, ale jo je dobrej myśli a wiym, że jom na isto znojdzie!

Wy się tyż podziwejcie na swoji życi a hnet uwidzicie, że mocie wiela talyntów, co ło nich ani niy wiycie – dobrze mieć zamiłowani.

Grymlino.

Jeśli podoba Ci się ten tekst –  inne podobne możesz przeczytać tutaj.

Słowniczek:

Kamradka -koleżanka,
Łodewrzić – otworzyć,
Obegnać – opędzić,
Dort – tort,
Wynokwiać – wymyślać,
Ruski rok – bardzo długi czas.