Gołymbiorze – gołymbie

• Facebook
• Pinterest
• Twitter
• Gmail
• Drukuj

Gołymbiorze – gołymbie

Mój somsiod Konder Kukla łogromnie przoł pultom. Gołymbnik mioł nojpiykniyjszy we łokolicy! Nad warzkuchniom, kaj piyrwej mioł swoja ajncla starzik Łomozik, łojciec łod jego baby. Terozki urzyndowały gołymbie, a śnimi Konder a potym tyż jego baba Hyjdla, yny jejich synek Jorguś ło pultach niy chcioł ani słyszeć! Wszystek łod tego czasu, jak mu tatulkowy pupilek ,tym srokocz, łobsroł kamratka ze klasy. Łona potym wszystkim dzieckom godała, że jak idom do Jorgusia to by se mieli wziońć parysole abo rygenmantle!

Somsiady jak to somsiady: jedni Kondrowi zowiścili, że mu te ptoki tak przoły, aż mu na gowie a na rynkach siodały a drudzy sie we czoło klupali.  Godali, ze tyn chop mo ptoka!

Roz za czos jechoł Kukla do roboty do Niymiec, czasym bez lato niy było go w doma i ze trzi – sztyry tydnie. Jak w tyn czos przipadły flugi, to był cołki chory. Porzad dzwonił do swoji baby a dowoł ji insztrukcyje, co a jak mo robić!

Jak mu kiejś dwa gołymbie niy prziszły,

to niy zdzierżył, ciepnoł robota a piyrszym cugiym przijechoł do dom, a te gizdy yno na to chyba czekały, bo jak Konder zawarł furtka to jedyn po drugim wleciały do gołymbnika. A łon sie yno łośmioł, a padoł, że te ptoki przed nim reszpekt majom!

Jedyn roz Konder puścił swoji pulty na flugi aż do Belgije. Ni mogł ani uwierzić, że te ptoki tak sie poradzom uwinońć. Radowoł sie łogromnie, że jego gołomb bydzie na piyrszym miejscu. Gibko ściongnoł mu tyn guminowy ring ze szłapki a kozoł Jorgusiowi, coby go zawiozł do zygara. Synek łopoloł sie prawie na placu, gibko wyskoczył na koło a gumin wsadził do gymby, bo we badkach ni mioł kapsy. Kole Materowej chałpy jakiś cudzy pies mu przelecioł bez droga.

Jorguś zabrymzowoł, a zaroz potym wywalił sie do rantu a przi tym społknoł tyn guminowy ring, co miał iść do zygara. Chocioż był fest potrzaskany, polecioł gibko ku mamulce, bo łojcowi boł sie pokozywać na łoczy. Kukle mało hercszlag niy trefił! Chycił flacha ze rycynom a cołki kieluszek wloł synkowi do gymby. Za kwilka Jorgusia zaczło morzić a po połgodzinie Konder mioł nazod swój guminowy ring a som go zawiozł do zygara łodbić. Jednako za długo to wszystek trwało, bo mu piyrsze miejsce sprzed nosa uciykło!  Za to borok Jorguś podł łofiarom łojcowego zamiłowanio, bo jeszcze bez cołki tydzień mioł sraczka.

Grymlino (Nowiny 2010r)