Hajnuś i jego kryminalno zagadka

• Facebook
• Pinterest
• Twitter
• Gmail
• Drukuj

Hajnuś i jego Kryminalno zagadka

Nasz somsiod Hajnuś, co miyszkoł za nami tak ze trzista metrów we polu, łogromnie rod łogłondoł te kryminalne tyjatry „Kobra”. Jego baba Wefka strasznie sie śniego śmioła, jak godoł, że łon by tyż tak poradził, jak te inszpektory we telewizorze.

Jednyn roz stanoł Hajnuś ze łożka lewom nogom, bezto tyn dziyń zaczon sie pechowo. Wszystek było cołkiym inaczy niż se myśloł! Na rano niy było mylzupy, bo Wefka jechała do ciotki do Ksionżynic, bo bezmała ciotka choro fest była, a chciała Wefki widzieć jeszcze przed śmierciom, coby ji poronczyć, co ze pogrzebym. Potym przed połedniym przijechoł Józik Zmelka, Hajnusiow kierownik ze roboty, a padoł mu, że mo prziść na drugo zmiana miasto na noc, bo Francikowi Korbelowi urodziło sie dziesionte dziecko i je tak nażgany, że do roboty niy przidzie. Hajnuś łogromnie niy rod był tyj drugi zmianie, bo praje we tyn dziyń leciała „Kobra”, a teroz to łon ani konska niy łoboczy, bo bydzie harowoł we robocie, ale mus to mus!

Hanjuś i jego przigoda

Było już po jedynostej jak szoł nazod do dom. Światła na głownej drodze niy świyciły, bo ich gasili skuli łoszczyndności, a miesonczka tyż na niebie niy było, bezto jak wlozł do pola, zrobiło mu sie markotno. Wele była staro zegrodka, a Hajnuś słyszoł, że tam gdoś cichuśko godo, ale za kwila uznoł, że sie mu zdało. Gibnoł sie trocha a ani wiela pod nogi niy patrzoł, łoroz na pojstrzodku miedze dojrzoł cos biołego, schylił sie a sam leżom dwie gołe babski nogi!
-Gdo mi sam tyż trupa przismyczył? – dziwowoł sie na głos .
-Jak sam som nogi ,to reszta musi być we tym łowsie – medytowoł – szkoda, że ni mom taszy lampy…- a schylił sie jeszcze niżyj, żeby cosikej dojrzeć.
-Co se życzycie panoczku?! – odezwoł sie jakiś młody chopski głos a ze łowsa wyjrzały dwie gowy.
-Dziynki Bogu, żyjecie, kamiyń mi ze serca spodł! – łodpedzioł Hajnuś a szoł swojom drogom.

Nigdo by sie ło tyj przigodzie niy dowiedzioł, bo chop łod gańby trzimoł jynzyk za zymbami, ale za jakiś czos Wefka chciala zrobić uciecha Hajnusiowi, a kupiła dwa bilety do kina na nojnowszy polski kryminał. Jednako łon padoł, ze niy pódzie, a żeby sie baba niy gorszyła na niego, pedzioł ji, co go wtynczos spotkało.
Grymlino.

Druk Nowiny – Wydanie: 2009/39 (2723)

Słowniczek:

miesionczek – księżyc,
pojstrzodek – środek,
gibnońć się – przyspieszyć,
przismyczyć – przyciągnąć.