Miłego dnia! – dobre słowo na kartce

• Facebook
• Pinterest
• Twitter
• Gmail
• Drukuj

Dobre słowo na kartce.

Dycki jak rano stana, tak czytom na kartce, co nasza cera – studentka łostawio na stole we kuchyni. Nikedy namaluje ku tymu uśmioto gymbulka i wiycie, że sie łod tego człowiekowi jakoś na sercu ciepli!

Jak dziecka były jeszcze małe, wykombinowali my społu tako gra, że jak kery do pozor, że drugimu je ciynżko na duszy, to mu powiy abo napisze na kartce jakiś dobre słowo. Nasza dziołcha niy poradziła jeszcze wtynczos pisać i padała, że bydzie malować łobrozki. Tak po prowdzie, to żech ani wiela niy wierziła, że to chyci, ale dziecka ło tym delszy czos pamiyntały. Roz za czos dostowałach kartki ze wierszykami a malunki, a sama, żech tyż ich trocha rozdała. Nojwiyncy żech sie jednako uśmioła, jak mój przibrany synek koniecznie chcioł mi zrobić radość, ale wymyślani wierszyka szło mu ciynżko. Bezto z naszyj domowyj bibliotyczki wyciongnoł ksionżka ze wierszami, a jedyn cołki przepisoł na kartka i sie pod nim podpisoł. Chocioż wierszyk niy pasowoł do sytuacyji, synek skutek łosiongnoł, bo jo żech sie łośmioła! Aż żol mi było, że musiałach mu potym pedzieć, że tak sie niy robi!

Miłego dnia!

Jak żech za bajtla niyrada szła kaj ze starkom, dycki mi przipominała:

-Dziołcha, jak komu niy przajesz, niy pokazuj mu krziwej gymby a zamiast padać mu co złego, lepi życz mu „dobrego dnia”, bo taki człowiek bardzi go potrzebuje niż ty!

Starczyne rady mi sie potym czynsto we życiu przidały!

Na poczontku dziewiydziesiontych lot potrzebowałach trocha przirobić, a żałożyłach „działalność gospodarczo”, bezto musiałach wiela łazić po urzyndach a tam siedziały taki paniczki, co nikedy umiały być fest niyfajne! Moja mało cera niy poradziła tego dycki zdzierżyć, a jedyn roz, jak my już wychodziły, padała na cały głos:

-Mama, po co chodzisz do taki babochy…

Na drugi roz pani urzyndniczka była cołkiym miło, widać se wziena do serca to, co maluśko padała, ale raczy kaj sie dało, stosowałach filozofijo moji starki. Jak kiero paniczka wyskoczyła na mie z gymbom, jo ji jeszcze podziynkowała za informacja a życzyłach „miłego dnia”. Ze poczontku to sie te baby dziwały na mie, jak na jako wariatka, ale potym wiela razy mi tyż same łod sie co doradziły.

Widzicie z tego, że to rychtik działo, bezto radza wom: sprobujcie kerymuś, co wos czasym wkurzo, pedzieć „miłego dnia”, to wiela niy kosztuje!
Grymlino.

(Nowiny 2010 r.)

Słowniczek:
zdzierżyć – wytrzymać, znieść,
dziwać się – patrzeć,
wkurzać sie – denerwować się