„Wielgi Tydziyń”/fragment/.
We pyndziałek sie zaczynoł Wielgi Tydziyń., a wszyjscy musieli iść do spowiedzi. We Wielgim Tydniu to sie ani wiela niy robiło, a wszystek musiało być skończone nojpóźni we Strzoda wieczór.26
We Wielgi Szczwortek
We Wielgi Szczwortek szło sie do kościoła na mszo a potym we wieczór na adoracyjo.Łod Szczwortku się tyż już ze chałpy nic niy wydowało ani niy pożyczało, a wszystek bez te marchy, co krowom mlyko łodbiyrały.Jak gospodorz wbił widły do ziymie na pojstrzodku placu to sie niczego boć niy musioł, choć farorz przezywoł ze ambony na taki breweryje.
We Wielgi Piontek
We Wielgi Piontek wczas rano ludzie szli się umyć do rzyki abo stawu, coby być zdrowy bez cołki rok. Rano była tyż łostatnio Droga Krziżowo, a potym yno adoracyjo przi Bożym Grobie. Dzwony były zawionzane bez cołki Piontek a Sobota, bo Ponbóczek leżoł we grobie. Nojwiyncy z tego uciechy mieli ministranty. Drzewianymi klapaczkami robili wele kościoła taki larmo, że dzwony by wiynkszego niy zrobiły, ale tako je tradycyjo!
We Wielgo Sobota.
We Wielgo Sobota. rano abo popołedniu farorz świyncił jodło. Niosło sie go do kościoła połne kosze abo wiózło furom. Świynconego musiało styknońć na cołki dwa dni świont. We bocznej kapliczce stoł dycki koszyk do ubogich, a ludzie tam dowali, co kery mógł ze jodła. We wieczór jak już było cima świynciło sie woda a łogiyń. Zapolało sie tyn dugi palmowy sztyl łod świynconego łognia. Z niego robiło sie po Wielgi Nocy krziżyki a wbijało po rogach pola, coby grad obiyli niy wybił.
We Niedziela Wielkanocno
We Niedziela Wielkanocno wszyjscy sie wybiyrali do kościoła na Rezurekcyjo, ale jak sie prziszło nazod do dom to dziepiyro sie jadło. Nojprzod na stół trefiły jajca, potym szinki, wuszty a roztomańte babówki .
We Śmiergust
We Śmiergust chopcy loli wodom dziołchy a we wtorek czasym dziołchy synków, no a nejdeli we strzoda zaczynoł się normalny żywot.
Grymlino.
