Starczyno kuchyń
Pamiyntocie jeszcze jako to było we kuchyni łod starki? Starczyne noczyni jakimś cudym łobstoło bez drugo wojna a używali my go potym jeszcze delszy czos. We piyndziesiontych latach dali nom pomiyszkani przestawione ze starego sklepowego magazynu. Wygodow tam niy było, ale kuchyń my mieli wielko, ale miała yny jedne niywielki łokno. Jedna mało izbetka miała starka ze ciotkom, a drugo – nasza familijo, ale i tak siedziało się bez cołki dziyń we kuchyni. Bez zima dycki było u nos połno ludzi, bo mój tatulek dostowoł deputat wonglowy. Mogli my uwarzić łobiod na blasze, a we wieczor zagrzoć se we zieleźnioku.
Kole dźwiyrzy we naszyj kuchyni stoła drzewiano umywalka. Na ni dwie emaliowane miski, jedna do mycio gymby a rynkow, a drugo na nogi, trzecio starka miała skowano we kochtiszu na pomywani talyrzi a garcow. Pod umywalkom dycki stoły dwa kible ze czystom wodom a mało konewka. Wedle wisiały rynczniki łod cołki familiji. Pod ścianom stoł bifyj a zaroz za nim kochtisz, a nad nim wisiała romka ze gywyrcami. W samym rogu była kachlowo blacha, co na ni szło warzić a we rule piyc. Nad niom dycki schły zieliny na tyj. Naprzeciw dźwiyrzy wisioł krziż a pora świyntych łobrozkow. Pod nimi stoła leżanka. Jak kery przijechoł na odwiydziny, mogł się na ni przespać. Bliży łokna stoł stoł a szejść twardych stołkow a na ścianie wisiała wyszywano garnitura.
Wielgi zdrzadło wisiało we rogu, troszka wiyrchym łodchylone, coby się człowiek mogł cołki łobejdrzeć. Był jeszcze kalyndorz a żegnaczek wele dźwiyrzy! Inksze klamoty: drzewiane waniynki na pranie a kompanie, rompla, dziyżka na chlyb, krałzy ze kompotym, mietły, wielgi boncloki a beczka na kapusta były skowane we komorze. Tam my tyż mieli grodza na zimioki. A potym kupili my se radio, co miało „magiczny ślyp”, a antyna ze drutu.
Grymlino.
Słowniczek:
noczyni – meble,
łobstoło – przetrwało,
pomiyszkani – mieszkanie,
przestawione – przebudowane,
izbetka – mały pokój,
zieleźniok – żeliwny piec do ogrzewania,
dźwiyrze – drzwi,
konewka – naczynie do polewania, z uchwytem z boku, rodzaj dzbana,
bifyj – kredens,
kochtisz – mebel kuchenny z blatem roboczym,
romka z gywyrcami – półeczka z przyprawami,
zieliny – zioła,
twarde stołki – drewniane krzesła bez tapicerki,
rompla – tara do prania,
krałzy – słoiki,
boncloki – naczynia kamionkowe,
komora – spiżarnia,
grodza – oddzielona część pomieszczenia
