%20no-repeat%20center%20center;-webkit-background-size:cover;-moz-background-size:cover;-o-background-size:cover;background-size:%20cover;)
Je zima abo ji ni ma?
Teroz zimy momy coroz cieplyjsze, ale bych sie wetła ło to, że tako prawo zima ze śniegiym a mroziskiym jisto chocioż jedna musicie pamiyntać, przipomnijcie se dobrze!
Już słysza jak godocie: pamiyntom, było mi piyńć, mie było łoziym abo dziesiyńc. Wiyźli mie do szkoły saniami, jo żech wpodł we wielki zumiynta pod lasym. Jak żech szła do starki, to ale kurzilo a zamiatało śniegym… Jak by my se to poznaczyli na kalyndorzu, to by sie łokozało, że wiela takich zimów było, yny my to już niy pamiyntomy.
Zima w 1962 roku
Jo tyż tako zima pamiyntom: było to w roku 1962 miałach łoziym lot. Tata mie dycki na plecach do drogi wynosił. Czekali my na mlyczkorza, co jechoł ze Osin, tyn chop broł mie na sanie a wiózł aż do centrum Żor. Potym łon skryncoł na Kleszczówka do mlyczarnie, a jo szła bez rynek do szkoły.
My sie teroz dziwomy na prognozy pogody we telewizorze, a jeszcze sie nom to czasym niy zgodzo. Piyrwej ludzie wiedzieli do przodku jako bydzie zima a jaki lato, bo umieli dobrze łobserwować prziroda. Jak wywiórki a sojki robiły wielgi zapasy, znaczyło to , że zima bydzie dugo.
Dzisio to by może jeszcze dziecka wywiórka poznali, ale ło sojce ,to już małokery wiy. Jak sie na dymbie dugo trzimały liści, to na zima trzeba było jeszcze poczekać, abo zima była leko, to znaczy bez wielkich mrozów.
Starka godali
Moja starka przepowiadała zimowo pogoda ze cebule, co jom całe wionki wisiały we komorze. Jak spodł piyrszy śniyg, czasym na Jadwiga, kiedy indzi na Marcina abo we Wszystkich Świyntych. Starka przinosila jedym wionek cebule do kuchynie, urzinała jedna gowka, a potym my jom seblykali. Czasym miała i siedym-łoziym szatów a mocno sie trzimały, to my wiedzieli, ze zima bydzie fest, a pojeżdżymy se na sonkach. Tego roku cebula mo yno trzi szaty, ale fest sie trzimajom, bezto zima bydzie krótko, śniyg raczy bydzie a mrozy przidom dziepiyr kaj we lutym. Łoboczymy eli sie sprawdzi, co myślicie?
Za bajtla
Jak żech za bajtla chodziła ze starzikiym futrować zwiyrzina na polach, to mi dycki godoł na co mom sie dziwać: Jak kuropatwy a bażanty niy lotajom ani niy łażom a zajonce siedzom przi ziymi, choc je dobro pogoda, to do dwóch-trzech godzin bydzie burza śniegowo. To samo, jak sorniki niy wychodzom na pola, a kryjom sie na kraju lasa.
Przed łopadym śniegu niy polujom tyż drapiyżne ptoki. Jak mo być delszy czos mróz, ptoszki niy siodajom wysoko na stromie ani na końcach gałynzi yny bliżej pnioka. Łostatnio mi się ta pogodowo wróżba sprawdzo. Jak ida do sklepu, musza przyńść kole starego, szyrokigo, somsiadowego żywopłota. Jak siedzi w nim stado wróbli a gośno ćwiyrko, to do dwóch dni je mróz a bo śniyg, a czasym jedne i drugi.
Kiejś wrożyli tyż podle nikerych dni we roku. Prognozy roztomajcie wychodziły, ale moji mamie dycki wyszły dobrze. We Wilijo dowali my na stół zdrowo cebula potym my jon dzielili na dwanoście płatków, postawili w rzondku, a na kożdy nasypali troszka soli, a na drugi dzień sprawdzali kiery je mokry i wiycie, czynsto mokry był maj.
