Ślonzok mondry po weekendzie
Łostatnio mieli my ważno rocznica, ale doszli my ze chopym do wniosku, że zamiast
sproszać gości a potym ich obskakować, to my se pojadymy na weekend do Wisły, kaj my już chyba ze dziesiyńć lot niy byli, bo dycki jeżdżymy we lutym na dwa – trzi dni we okolice Żywca.
Nasza synowo zamówiła nom dwa miejsca bez internet. Mój chop wzion se narty a jo badykostim, bo na reklamie pisało, że majom tam jacuzzi a sauna. Do cyntrum tyż miało być yno piyńć minut drogi, co mie wielce cieszyło, bo jo na nartach niy jeżdża, to zamiarowałach połazić po sklepach, cóż kej na miejscu było zdziebko inaczy, niż my se to przedstawiali.
Te piyńć minut do cyntrum to by trza było lecieć fligrym, bo autym jechało sie aż piytnoście. Za sauna a jaccuzi trza było osobno a słono płacić. Izbetka była malutko jak klotka. Stoło tam łóżko ze ciyniuśkom kołdrom, co my na nia spoczontku myśleli, ze to je deka, ale zima niy było, bo grzoli we cyntralnym, jednako cołki konszt był we tym, że jak sie jedyn kołdrom przikrył, to tyn drugi był goły.
Szranku niy było,
yno zieleźny wiyszok, bezto my łachy we koferku musieli trzimać. We rogu stoła niywielko komoda a na ni mały telewizór, ale i tak na nim nic łoglondać niy szło, bo antyna niy chytała. Był tam jeszcze jedyn stołek bez łoparcio a maluśki nachtiszel, co mioł blat wielkości sznuptychle. Na nim my jedli śniodani a wieczerzo. Mój chop sie mało niy rozpłakoł, jak to wszysko uwidzioł, bo se spomnioł jako my miyszkali łońskigo roku. Izba była szykowno, łaziynka we pojstrzodku, stół a dwa elegancki stołki, a to jeszcze za o wiela myjsze piniondze, ale tym razym byli my we kurorcie a niy we jakijś pipidówce, za to tyż trza płacić!. Z poczontku to my chcieli jechać nazod, ale potym my se padali, że jak my już tu som, to te dwa dni jakoś wytrzimiymy! Na łobiod chodzili my do baru we cyntrum Wisły i o dziwo, jodło było dobre a niy nojdrogsze. Majom tam tyż dobre kołocze, samach jadła, bezto pokwolić moga! Jednako chyba nojlepi smakujom nimieckim penzyjonistom,co czynsto prziyżdżajom do Wisły na wywczasy, bo wiela konsków roztomajtego kołocza kożdy kupowoł..
Niy umicie se ani przedstawić, jak my sie radowali, kej my przijechali nazod do dom!. Mój chopeczek mo swój zesel, kaj rod siodo a sudoku rozwionzuje. Telewizor nom niy mrugo, bezto do sie łoglondać wszyski ulubione seriale a kołdry we łóżku je zatela…Wcale by my o tym niy wiedzieli, że momy sie w doma tak dobrze, jakby my we tyj Wiśle niy byli!
Teroz rozumia, czamu nasza starka Elza dycki wiyszała na ścianie nad stołym garnitura, co jom we sztyry a dwadziestym na ślubny gyszynk łod kuzynki Dolores ze Wielowsi dostała. Było na ni wyszyte troszka koślawym pismym:
Domek ciasny, ale własny.
Grymlino.
Jeśli podobało Ci się opowiadanie “Ślonzok mondry po weekendzie” to zapraszam do czytania innych z cyklu po naszymu
Koniecznie zajrzycie na mój profil na Facebook.
