Jak żech roboty szukała

• Facebook
• Pinterest
• Twitter
• Gmail
• Drukuj

Jak żech roboty szukała

Odchowałach dziecka, a chciałach iść do roboty. Zapisałach sie do biura pracy. Tam poradzili mi, cobych se podwyższyła kwalifikacje. Poszłach na kurs, co żech se go sama znodła. Niy musiałach płacić, bo był za piniondze ze Unii. Bez rok uczyłach sie roztomańtych programów na komputerze a angielskigo. Lepij szło mi ze tego angielskigo, jak ze komputera. Tyn młody chopeczek, co nos uczył, jak widzioł same starsze babeczki, to sie spoczontku wiela niy wysiloł. Dziołchy sie gorszyły, że mało poradzom, ale żodno nic głośno niy pedziała, yno jo se poszła tyn dziób parzić a do końca jeszcze my sie tego wiela nauczyły. Szkoda, yno, że potym tyj roboty dali niy było!

Bez feryje pojechałach na dwa tydnie do roboty do Holandyji. Niy powiym, angielski sie przidoł. Robota tyż dało sie strzimać, yno słabiło mie to, że we nikere dni , jak niy było ludzi, musiałach iść do roboty dwa razy do dnia, a to je zatela na baba, co ji je bez piyndziesiont. Bezto żech wiyncy niy chciała szukać roboty za granicom i żech roboty szukała blisko doma. Myślałach se, że sie u nos dostana do biura, bo sie znom trocha na komputerze, ale jak żech kaj poszła za robotom, to sie dziwowali, co tako staro baba chce. Dycki coś wymyśleli, że niby teroz roboty ni ma, że mom czakać, aż sie łodezwiom i jo gupio z poczontku czakała, ale jak po miesioncu nigdo niy dzwonił, to żech noreszcie była w doma!

Roz jedyn znodłach we gazecie łogłoszyni,

co tam stoło, że szukajom osoby do biuro nojlepi ze znajomościom obcych jynzyków. Jo dwoma godom dość dobrze, trzecim sie tyż dogodom, łod biydy coś tyż po tym angielsku bekna, no a jeszcze by sie znodł taki jynzyk, co go rozumia. Wszysko żech to na pisała do CV. Tyn panoczek, co sy mnom godoł, niy dowiyrzoł, eli jo to wszysko naprowdy umia, bezto musioł mie jeszcze wyegzaminować.

Myślałach se, że sie noreszcie do roboty dostana, ale tyn chop mi padoł tak:
-Wiycie babeczko, je prowda, że wiela tego poradzicie, ale jo potrzebuja szpeca, co godo po chińsku, bo do roboty zamiarujymy skludzać Chińczyków!
Na tako godka to jo żech sie wkurzyła, prasłach dźwiyrzami a dali byłach bez roboty.

Po tydniu jednako zaczłach nad tym medytować., ale mój synek mi padoł, że chiński je łogromnie ciynżki i niy naucza sie go przed sześdziesiontkom, a potym to mie czeko yno pynzyjo.

Grymlino.

Zapraszam do czytania innych opowiadań – znajdziecie je Tutaj.