Październik – Po Urszuli w ciepłyj koszuli!

• Facebook
• Pinterest
• Twitter
• Gmail
• Drukuj

Październik – Po Urszuli w ciepłyj koszuli!

Momy już październik a trza sie cieplij łoblykać. We drugi połowce miesionca czynsto sie już śniyg abo i leki mroz pokozywoł, chocioż do zimy było jeszcze daleko. Jak żech była bajtlym, nasza somsiadka, rodym łod Czynstochowy, dycki na podzim śpiywała tako pieśniczka: Szła Urszula po łonce, rozsypała pereł tysionce, słonko wstało wyzbiyrało…

Jo zaroz była ciekawo, kaj ta Urszula chodziła, coby se tych perełkow nazbiyrać a prziniyść mamulce! Dziepiyro starka mi pedziała, żebych śnich wiela korzyści ni miała, bo to je zamarzniynto rosa! Byłach łogromnie zło, że mie w tej pieśniczce nabrali, ale pamiyntom jom do dzisio!

Październik, to był prawie tyn czas, kiej gospodynie zaglondały do skrziniow na gorze a do szrankow. Wietrziły kożuchy, rube chusty a wołniane ancugi. Wszyski ciyńsze łoblecze pakowały do płóciennych miyszkow a potym do szrankow. Coby mole ich niy zeżarły, wiyszały we pojstrzodku pukety bagynci. Chopy szli na gora po boty ze cholewami a zimowe strzewiki łod familije. Potym ich mazali sadłym abo czornym, fabrycznym gutalinym. Na Wszystkich Świyntych ludzie szli na cmyntorz obleczyni jak na zima.

Za mojich modych czasow tyż to tak wyglondało.

Mantle a kurtki wyciongniynte ze nylonowych bojtlow długo trza było wietrzić, bo inaczy by sie dziecka we szkole śmioły,
że śmierdzom myszami!

Była żech we szostej klasie, kiej mamulka kupiła mi modry mantel ze modnego w tynczos laminatu. Oblykłach se go, jak żech szła świycić na cmyntorz. Mojim kamratkom łogromnie sie widzioł, ale jedna tako Ewka koniecznie mie chciała znerwować, bo padała, że musioł być ze przecyny, bo inaczy to by mi go mamulka niy kupiła, bo sztyjc ni mo piniyndzy! To była łogromno zniewaga a jo i tego niy mogła przepuścić, bezto zaroz my sie wzieny za kudły! Skończyło sie na tym, że jo se wypoliła dziura we mojim piyknym mantlu. W doma było kozani, alech sie niy prziznała, ło co poszło. Nojgorsze, że musiałach chodzić dali we starej jakli! Na Godni Świynta przijechała ciotka ze Rajchu a nawiozła roztomańtych żurnalow. We jednym były modne aplikacje. Jo se tyż tako zrobiła a mantel był uratowany.

Grymlino. Nowiny Wydanie: 2010/42 (2778)

Słowniczek:

łoblykać – ubierać,
ancug – ubranie, kobiecy strój chłopski,
płóciynny miyszek – woreczek z płótna,
bagynć – roślina bagno zwyczajne,
mantel – płaszcz,
jakla – bluza, kurtka.

Zapraszam do czytania innych opowieści po naszymu.